ඉතාලිය හරහා පෘතුගාලයට පැන යාමට තැත් කළ තරුණයෙකු කටුනායක දී අත් අඩංගුවට .

 

ඉතාලිය හරහා පෘතුගාලයට පැන යාමට තැත් කළ තරුණයෙකු කටුනායක දී අත් අඩංගුවට .

                කූඨ ලේඛන ඉදිරිපත් කර , ඉතාලිය හරහා පෘතුගාලයට පැන යාමට තැත් කළ , ශ්‍රී ලාංකික තරුණයෙකු 2/14 දින අලුයම කටුනායක ගුවන් තොටුපළ පිටත්වීමේ පර්යන්තයේ දී ආගමන විගමන දෙපාර්තමේන්තු නිලධාරීන් පිරිසක් විසින් අත් අඩංගුවට ගෙන තිබේ .

                මොහු යාපනය ප්‍රදේශයේ පදිංචි 35 හැවිරිදි තරුණයෙකි .

             ඔහු 2/14 දින අලුයම 3.10 ට කටාර්  ගුවන් සේවයේ කිව්.ආර්.- 663 දරන ගුවන් යානයට , ඉතාලිය හරහා පෘතුගාලය වෙත පිටත්ව යෑම සදහා කටුනායක ගුවන් තොටුපළ වෙත පැමිණ තිබුණි .

                ඔහු මුලින්ම ඉතාලියේ මල්පෙන්සා නුවර බලා පිටත්ව යෑම සදහා ගුවන් සේවා කටයුතු නිශ්කාශනය කර ගෙන , ගුවන් තොටුපළ විගමන අංශය වෙත පැමිණ තිබේ .

              එහිදී ඔහු ඉදිරිපත් කළ පෘතුගාල වීසා බලපත්‍රය , ජාත්‍යන්තර ප්‍රමිතීන්ට අනුකූලව නොවන අයුරින් සකස් කළ , ව්‍යාජ එකක් බව එහි සේවය කළ නිලධාරීන්ට අවබෝධ විය .

              එම නිලධාරීන් වහාම මෙම තරුණයා ප්‍රධාන ආගමන විගමන නිලධාරීවරයා වෙත ඉදිරිපත් කළ , එහිදී මොහු ඉදිරිපත් කළ වීසා බලපත්‍රය , ගුවන් තොටුපළ දේශසීමා ආවේක්ෂණ ඒකකය යොමු කිරීමට පියවර ගැනුනි .

              එහිදී මෙම වීසා බලපත්‍රය තාක්ෂණික වශයෙන් ව්‍යාජ ලෙස සකස් කළ කූඨ ලියවිල්ලක් බව තහවුරු විය .

             ඉන්පසුව මෙම තරුණයාගෙන් වැඩිදුර ප්‍රශ්න කිරීම් සිදු කළ අතර , එහිදී පෘතුගාලයේ සිටින තම ඉන්දීය ජාතික මිතුරෙකු , තමාට එරටට පැමිණීම සදහා උදව් කරන බව පැවසීය.

              පසුව මෙම තරුණයා අත් අඩංගුවට ගෙන වැඩිදුර විමර්ශන කටයුතු සදහා ගුවන් තොටුපළ අපරාධ පරීක්ෂණ දෙපාර්තමේන්තු නිලධාරීන් හට භාර දීමට පියවර ගෙන තිබේ .

              කටුනායක ගුවන් තොටුපළ ආගමන විගමන සහකාර පාළක සුජීව රත්නායක මහතාගේ උපදෙස් මත , ප්‍රධාන ආගමන විගමන නිලධාරී එස්.පී.

රෝහණ මහතාගේ අධීක්ෂණය යටතේ ,

ආගමන විගමන නිලධාරීන් වන ජී.වී.ජී.

මධුෂාන් සහ ඩී.ඒ.ඩී.පී.ඔහාන් යන මහත්වරුන් මේ පිළිබඳව වැඩිදුර විමර්ශන කටයුතු සිදු කළහ .